ភ្នំពេញ៖ រដ្ឋមន្ត្រីព័ត៌មានលោក ខៀវ កាញារីទ្ធ បានរម្លឹកដល់ការបោះឆ្នោតជាតិនៅកម្ពុជាកាលពីឆ្នាំ១៩៩៣ ថាជាការបោះឆ្នោត «ដើម្បីរស់»។ ការលើកឡើងបែបនេះគឺដោយសារថាគណបក្សដែលចូលរួមបោះឆ្នោតនាពេលនោះមួយបក្សៗគឺមានអាវុធ និងកងទ័ពរៀងខ្លួន។
ថ្លែងក្នុងឱកាសអនុញ្ញាតដល់ប្រធានមូនិធិសម្របសម្រួល សហរដ្ឋអាមេរិកជាមួយឥណ្ឌូចិន លោក Jund McAuliff អញ្ជើញចូលជួបសំដែងការគួរសម និងពិភាក្សាការងារនៅព្រឹកថ្ងៃទី២៣ ខែមករា ឆ្នាំ២០២៣ នៅទីស្ដីការក្រសួងព័ត៌មាន លោករដ្ឋមន្ត្រី ខៀវ កាញារីទ្ធ បានលើកឡើងថាបញ្ហាធំគឺចំពោះអ្នកសង្កេតការបោះឆ្នោតកម្ពុជានៅសម័យអ៊ុនតាក់ គឺគេមិនបានយល់ឃើញអំពីការពិតពីការកម្ពជានាពេលនោះ ដោយច្រលំថាជាការបោះឆ្នោតប្រជាធិបតេយ្យ។
លោកថា៖ «គ្រាគេមិនបានយល់ឃើញអំពីការពិតគ្រាន់តែយកទ្រឹស្ដីគ្រាន់តែយកទ្រឹស្ដីអំពីការបោះឆ្នោតប្រជាធិបតេយ្យ ដោយភ្លេចថានៅកម្ពុជានៅពេលបោះឆ្នោត ១៩៩៣ វាមិនមែនជាការបោះឆ្នោតរវាងគណបក្សនយោបាយទេ តែវាជាការបោះឆ្នោតរវាងបក្ស៤ ដែលមានអាវុធ មានកងទ័ព និងរចនាសម្ព័ន្ធគ្រប់រៀងខ្លួន គឺជាការបោះឆ្នោតដើម្បីរស់ គឺការដណ្ដើមគ្នារស់»។
លោករដ្ឋមន្ត្រីបន្ដថាបន្ទាប់មកទៀត គឺអាស្រ័យទៅលើការដឹកនាំរបស់សម្ដេចតេជោ ហ៊ុន សែន ដែលបានបញ្ចៀសហេតុការណ៍ជាច្រើន ទើបធ្វើឱ្យកម្ពុជាមានការរីកចម្រើនមកដល់ពេលបច្ចុប្បន្ននេះ។
លោក Jonh McAuliff ជាប្រធានមូលនិធិសម្របសម្រួល សហរដ្ឋ អាមេរិកជាមួយឥណ្ឌូចិន បានមាន ប្រសាសន៍ថា រូបលោកធ្លាប់មកប្រទេសកម្ពុជាតាំងពីទសវត្ស៨០។ ប៉ុន្ដែមកដល់ពេលបច្ចុប្បន្ន ពិតជាមានការរីករាយដែលឃើញការរីក ចម្រើនដ៏ខ្លាំងក្លានៅក្នុងប្រទេសកម្ពុជា។
ជាមួយគ្នានេះ លោកក៏មានបំណងរៀបចំជាក្រុមដើម្បីមកទស្សនកិច្ចផងក៏ដូចជាលោកចង់មកសួរមតិអំពីការរៀបចំបញ្ជូនអ្នក សង្កេតការណ៍នៅពេលបោះឆ្នោតកម្ពុជា។
លោករដ្ឋមន្ត្រីព័ត៌មានប្រកាសស្វាគមន៍ចំពោះអ្នកសង្កេតការអន្តរជាតិមកពិនិត្យដំណើរការបោះឆ្នោតឆ្នាំ២០២៣ នៅកម្ពុជា។
សូមបញ្ជាក់ថា ការបោះឆ្នោតជ្រើសតាំងតំណាងរាស្រ្ត សម្រាប់នីតិកាលទី៧ នៃរដ្ឋសភា គណៈកម្មាធិការជាតិរៀបចំការបោះឆ្នោត (គ.ជ.ប) ត្រូវបានកំណត់យកថ្ងៃអាទិត្យ ទី២៣ ខែកក្កដា ឆ្នាំ២០២៣៕